Pregrada.info - nezavisni pregradski portal

Kolumne

06.10.2014. 19:09:49 - Tomica Kolar

Prenosimo iz lista

Berba grojzdja - braje gruojzdja h Pregradi

Na kaj pomislite či negdu spomene da ide h braje?

Na slatke bobice med perstima i na jeziku? Na škarice, vedrice, hampere, pute, škafe, klenavu drešu, brieg, kliet, prešu i lagve, ke muoraju dišati kak ruožica, potprene s cvajgima, na ganterima? Na prostreti stol, ženske i muške kak ideju med redi, stare i mlade, veselje, šalu i popiefku?

Čujete marti kak gazda h šali govori da se muora h braju furt popievati, fučkati ili govoriti, ka se nijbi preveč zobalu? Ili vam več diši fina rakija, kera se muora piti h braju, dok se slatku gruojzdje (ipak) zoblje kuliku got komu paše, radi želuca, ka nijbi duo duobil sračku?

Marti vam h vuhu zatanca klopuotec, tielu oseti toplu jesensku sunce, stali ste med nebu i brieg, med redi pune obiešenega, slatkega blaga od kerega se persti i čube lepiju, a serce i nepce se čez liepu jesen počneju špancierati na putu proti nemu za kaj se tuo postoji i je, vinu finemu, daru Božjemu.

Či ste s kraja strajskega, či ste guost, zemite si cajta, nemojte tejki prejti! Pitajte kaj tuo je, kam se tuo ide, kaj se diela! Pitajte či trebaju pomagača, tuo je lozinka za pristup! Tešku bute našli nega ke bu vam rekal da ne treba. Zagorci voliju deliti svoje veselje, a h braju je tak! Nij tuo preteški posal, marti komaj keri krat za putara, či su berači preveč pridni. Puozvali vas buju radu na svoj brieg, k svoji klieti, k svojemu tersju, ponosu i diki svoji od davnine.

Tam bute doživeli diel nega kaj nemrete h večini širokega svieta. Zbiljam, zbiljam je retku ke na svietu ka bi skoru saka familija h jenem kraju miela malu tersje i dielala vinu za se, ali miela i veče tersje, tak, ka je vina zviš, za komu dati ili za prodati.

Kuliku je tersjaf, tuliku je i još več versti vina. Finega, se bolj finega, zatu ka Zagorci znaju kak se h tersju i h klieti diela.

"Kuliku kapljic, tuliku liet, daj nam Bog na sviet živet!", popievali bute hvečer, dok bu preša škripala, mošt tekal h potškavjak pa čez lakavnicu h lagef, pod obruče ili h svieklu rosfrajnu posudu. Starina keru bute pili, zbudila bu veseljaka hu vas i pofarbala lice. Nekeri gliboku hu sebe, razmeli bute, ke tie ljudi zmažeju snagu, vuolju i dobru vuolju h svojemu življeju.

Či ste Zagorec ili Zagorka, nemate se kaj punu čuditi. Lieta ideju, letu za letam, a vam je ot pervih korakaf, do stuolca na kerem bute sedeli kak stari ljudi, h žilaf, h mesu i h kostima zapakieranu nuo kaj su vam pustili stari. Vaša duša nij ravna, una hu sebe ma briege! Zelene, mehke briege i slatke, slatke tersave redi.

H Pregradi se od leta 1971. braje gruojzdja slavi kak narodnu veselje i svačanost.

Rad bi vam povedal kaj je se trieba napraviti h jenem letu ka bi se do te svečanosti došlu, kak je praf za praf teški i dugi put do sake vinske kaplje keru buma igdar koštali, zakaj su naši ljudi i jihavi guosti do kraja zaslužili, h najlepšem dielu leta, dneve slavlja i veselja.

Nij tega dugu, h tersju i za tersje, prek leta je trebalu:

Napraviti kuolje

Kuolje treba nasekati, obieliti ga i potšpičiti. Kuolje se sieče i bieli z vijakam, a špiči žlantafkuj ili z balticuj. Či je duo levak, kovač mu more napraviti vijak za levaka zatu ka z običnim nemre delati. Sieče se gacijavu kuolje i tam ke raste gacija za kuolje, zuove se kolosek. Duo nema svojega koloseka, uveke na nekakvem komadu zemlje ma verbe kere se opsekavljeju za kuolje. Zna se da je verbavu kuolje kratkega vieka, največ 3 ili 4 leti more kolek zderžati, a gacijavu kuolje traje duplu duž. Duo ma depše gacije za porušiti, nie jih onda porieže na duljinu kuola i onda se ta gacija kala, ka se dobiju koleki. Takvu kuolje se potšpiči na obadva kraje. Saku letu dok se h tersju oštri, kol se spuče, očisti od zemlje, pa se zapiči na drugu stran. Tak se saku letu okrieče i takvu kuolje derži jaku dugu.. Retku duo je mel kostajavu kuolje, ali si su znali da je najbuolje bilu meti takvega. Kuolje siečeju muški, bieliju i muški i žene, a špičiju ga opet muški. Kuolje se bieli i i špiči h koloseku, med verbami ili doma. Četerdeset kolekaf je jena Mera kuolja. Mogal si čuti kak negdo veli da je "…nasekal sedam mier.". Pridni ljudi su kuolje delali po zimi. Da je bil kakaf liepši dien ili je bilu mej sniega su ga nasekali, a onda su si s familije, duo je got mogal, bielili z vijaki, saki dien po malu. Kuolje se je dopeljalu h tersje čim je bilu moči dojti na brieg z vozam, s kravami ili kuoji.

Obrezati

Za rezati h tersju treba meti tersne škarice, a dobru je meti i kakvu miejšu žajgicu. Riežeju muški ali i ženske i treba znati rezati. Kak se rieže, večina je ljudi nafčila od svojega tateka ili dedeka, a uni su se istu tak nafčili od svojega tateka ili dedeka. Ne riežeju si jednak, ali si znaju kaj je roznik a kaj lucen, kuliku okaf (pupaf) treba pustiti na keremu, kak se ters nameče, a kak se rieže či ga nečeš nametati, či je lajsku letu slabije potiral i malu dal. Či je h tersju, a najbolj oko klieti, kakva brajda, onda se rieže tak ka je več roznikaf (z 2 do 3 oka), a mej lucnaf (z 7 do 9 okaf), a večinuma se tersi riežeju tak ka maju jen ili dva lucna i jen roznik. Ruožje se h tersju slaže na kupčeke keri se znosiju vun s tersja, a onda se tu ruožje naloži na vuoz, s kerim se je dopeljalu kuolje, pa se otpelja gmof. Doma se žjim kuri pod kuotlam za svije ili se potkurevlje h šporhatu. 

Podoštriti

Dok se nuovu kuolje po tersju raznosi, tuo z dalekega zgledi kaj da se je negdu igral i po tersju certal biele certice. Treba oštriti! Saki kol (pre sakemu tersu) i saki prikolič – bolj tenki kolek keri derži lucen, treba spukniti, čverstu ga prijeti h jenu ruku, a z vijakam h drugi ruki otsekati se kaj je trulu i nazaj potšpičiti. Tak podoštreni kol se prime z obadvie ruke i čverstu se h zemlju zapikavlje, več krat se h jenu ljukju naglu zapikne, dok nij dosti gliboku i čverstu. Prikolič je tenki pa se nemre zapikavati tak da bi se h zemlju hdiralu nek se s cieluj težuj h zemlju porine, glih kak kuolje za bažulj. Dok se oštri, tuj i tam najde se kolek ke je več star i kratek od oštreja, un se onda zameni z nuovim, bielim. (Tak se onda z dalekega vidi duo je poduoštril, a duo nij). Takvu se kuolje dene na kup i vozi gmof ili pre klieti još jen cajt čaka, a zuove se prakulje. Prakulje doma još dobru dojde za nakoliti paradajz ili vugarke ili za kuriti.

(Hnuogi su komaj čakali ka su s tersja mogli donesti prakulja, ke niesu meli dosti derf na pretilet, ka se je na jem, h krušni peči, spekla vuzmena pogača.) Pre oštreju treba paziti ka se koleki zapikavljeju liepu h red, a tersi ke zrasteju sim ili tam muoraju se onda ravnati proti kuolju, a ne kuolje proti tersaf. Dok je oštreje gotavu, po tersju ostane špičje, ostajki od oštreja. Špičje pobereju dieca h košare pa se tuo istu odnese ili otpelja gmof, za potkurevati. H tersju oštriju muški. Či je keri ters slabu hruodil, zna se našaliti čovek, pa veli:" .., a tak sam mu del liepi kol, na pretilet!". 

Prevezati

Tersje se veže z bekavim tertjam. Bekva je žuta verba, žilava i mehka za hvijaje. Bekva se h ranu pertilet opsieče i donese gmof, a terte se s tersnemi škaricami poštucaju i zvežeju h kupčeke ke se zuoveju kučice. Depše terte ideju h jenu kučicu, a tiejše posebnu, h drugu. Kučice se nosiju suobuj dok se ide h tersje vezat. Ters se veže za kol z depšuj tertuj, jen krat ili več krat, tak ka se se skup nijbi majalu (dok bi se kopalu, pa slučajnu z matikuj hderlu po kuolu, ka se nijbi s tersa stepale oči). Lucen se z miejuj tertuj veže za prikolič, tak ka se hvije vodoravnu i malu prema dole. Tak se hvija ka bi poklje ters mel več zraka i sunca i ka bi lepše rodil. Treba paziti kak se lucen hvija, ka nijbi puknil. H tersju vežeju i muški i ženske.

Skopati

H tersju se kopa pervi krat na pertilet, h travju mesecu, čim se tersje preveže. Kopaju si pre hiži keri su pre snagi, a ljudi h selu jeni drugima pomažeju kopati. Tuo je teški posal kak i oštreje i tie dien se pripravi bolj fina i jaka hrana. Duo ma punu tersja, kak je mel bežajski baruon Ottenfels, naruči si težake ke kopaju za nadnicu. Razme se, pre takvemu onda težaki dielaju i druge posle. (Moja babica Milka je, kak mlada puža, tak kopala pre baruonu za nadnicu. Bila je buosa i z matikuj si je posiekala perst na nuogi. Onda je jen mladi dečku, ke je istu kuopal, odrapil komad platna od svojih hlač i zavezal juj perst. I rodila se je ljubav. Tie dečku je poklje puostal moj dedek Ljujzek.) Kopa se z matikami kak je got matika velika gliboku, cielu tersje, od duoljega diela do verha, tak ka se matika zapiči h zemlju i zemlja se okrene na uopak (trava ili črievec se okreneju prema dole, a gore ostane samu zemlja). Dok se skopa, onda je h tersju jen cajt mier, ljudi se primeju drugega posla kerega na pretilet, fala Bogu, na zemlji ne fali).

H mladju prevezati

Dok oči potiraju i mladje zraste tak veliku ka ga veter more stergati, treba ga prevezati. Veže se z rafijuj. Rafija se diela ot palminega listja, prek muora dojde, kja z daleke Afrike ili Amerike, a kupi se h dučanu. Žjuj je lehku i liepu vezati. Naši stari su za vezaje delali liko. Liko se je delal ot jene verste lipe, kera sa zuove lipovec. Lipovec raste bolj kak germ, a ne drievu i jengava potkuožica je mehka i žilava, najbuolja za vezaje. Vežeju si, i muški i ženske.

Prekopati

Dok zemlje počne opet zbijati trava i dračje, h tersju se prekapa, Kopa se drugi krat – jednak nak kak i pervi krat, ali je kopati leš, zatu ka je zemlja rahla od pervega kopaja. Či je suša, treba duže čakati prekapaje.

Špricati

H tersju se šprica več krat i tuo z galicuj - bakram i z razmočenim hmorjenim vapnam. Šprica se i sumporam, a špric se kupi h dučanu. Bolj je letu dežovnu i vlažnu, bolj h tersje ide bolest. Či je bolj suša – bolesti je mej, onda i špricati treba mej krat. Duo je buolji gazda, pre klieti si je napravil cisternu za vuodu, s kruova se uveke dosti nateče ka ma za špricaje. Drugi vuodu za špric dopeljaju na vozu, a vidal sam i ljude ke su na brieg vuodu nosili hamperaf. Matrijal – špric se napravi h staremu škafu keri je samu za ti posal ili h stari voznici kera nema jene diena. Šprica za špricaje je od bakra i nosi se na plečaf. Z jenuj rukuj se pumpa, a z druguj se šprica. Po jeni redi se ide gore i dole špricuj, po saki strani, tak ka se se dobru dosegne i pošprica. Špricaju samu muški.

Tertjačiti

Letu ide, a drač je terdoglaf. Opet zbija vun na sakem komadiču zemlje. Dok poklje prekapaja zraste do dva pedja visoku, ide se nazaj na brieg. Zemeju se matike i tu se dračje potuče, plitku prekopa i tuo se zuove tertjačiti. Tuo moreju delati si.

Vezati

I ruožje raste kaj bedastu. Treba ga opet z rafijuj prevezati, tak ka ne visi na se strane, ka se po tersju more hoditi i ka se leš šprica. Či se nijbi vezalu, več se h sredini leta nijbi moglu prejti med redi, tak bi se bilu zarašenu. Kupček rafije se dene pod hlačjak ili se špaguj zveže oko pasa, h jeni je ruki nožek ili kastura i po malu se cielu tersje z vezajam dene h red.

Štucati i triebiti

Dok je ruožje veliku, treba dojti h tersje triebit. Panuge kere zrasteju po ruozgi treba potergati zatu ka samu jemljeju tersu jakost keru treba za gruojzdje, a treba i razriediti listje ka se tak ne zadelavljeju bolesti, a grozdeki maju več sunca. Ruozge ke zrasteju visoke prek dva metre od zemlje treba istu tak odrezati i tuo se zuove štucaje. Več krat se potrefi tak ka se tertjači, triebi i štuca isti dien. Či se stigne, onda se i pošprica.

Podžeti

Dok dojde jesen i gruojzdje dozrieva, najlepši je diel leta h tersju, ali nekaj još čaka pridne ljude. Treba travu, ke je opet zrasla, fundati. Najleš bi travu bilu pokositi, ali redi su vuske jen meter, ruožje je zraslu sim i tam, nema druge nek zeti serpe i prijeti se posla.

Podžijaje je zadji posal h tersju priet berbe.

H tersju, ali ne i pre klieti. Kliet je Zagorcu čistu posebna priča. Hu ji se događaju posli keri su sikak zaslužili posebnu pisaje. Marti bi dobru bilu samu napomeniti kak treba pred braje posudu (lagve, škafe, vedrice, lakavnicu, putu) najpriet zamočiti, a onda dobru oprati ka nijbi bilu nikakve gerde duhe, da prešu treba dobru oprati i pripremiti.

Nijbi ipak bilu praf či bi se pozabili zmisliti na ne nesriečne lieta dok je h tersje došla tuča, pa je h kratkem cajtu jenega popuolneva, dok se je Babinega kuta zdignil teški, černi oblak, priroda još jen krat pokazala čoveku da nij gazda cielemu svietu, a bogme niti svojemu tersju.

Tersje ne treba gospodara nek sljugeta, rekli su naši stari i hu ti poniznosti je skrita najliepša mudrost keru čovek, ke obdelavlje tersje, hu jem more najti. Tu letu, dok je h Zagorje (valjda z Indije) došla sezona Monsunaf i si su po malu strahu, kakva bu berba, nigdo nij rekal da tersje treba posekati. Daj se ot sebe i či ne tu letu, ili drugu, došlu bu letu da buš duobil se poverjenu h zlatu, h zlatnimi kapljami!

Zakaj su Pregračani ziebrali baš braje gruojzdja za svoje slavlje? Praf su meli!

Čes cielu letu ljudi su punu i tešku delali. Ne samu h tersju. Hranili su krave, svije, meli su perad sake felje. Za su živad trebalu je hranu pripraviti pa su sejali karuzu, šenicu, ječem, zuob, herž., rebundu, repu. Za se su sadili bažulj, bob, krumpier, h vertu sega. Muorali su si pripriemiti derva za zimu, kermu za blagu spraviti, furt je i furt bilu nekakvega posla. Sedamdesetih liet ljudi su se počeli se bolj zapošljavati. Dok su došli s posla, doma jih je počakal drugi posal. A posal je bil jen teži, a drugi lieži, jen gerši, a drugi liepši. I h tersju je bilu tak, ali je verhunec posla h tersju i nuo kaj su duobili od jega bilu nekak najbolj važnu za nuo kaj si ljudi na svietu išeju - kriepost i veselje. H vinu je bila jakost keru su si razmeli. Sa se je muka, cielega leta, h jenemu dnevu pretočila h popiefku i radost, nekak je se melu lepšega smisla.

Priet nek je bilu Zagorcaf, negdu je rekal da je h vinu istina. Nij bil bedak. Vinu pomore čoveku, ka na vidalu zijde jengava prava naraf. Či je po naravi dobrek, meren i veseljak, dok si ga spije malu več – još bu bolj dober, bolj meren i vesel. Či pa je po naravi nuor, dok ga spije malu več, još bu bolj nuor i još buju bolj buogi nie ke su merni i dobri puolek jenga. I onda se zmislima da je vinu doneslu i punu lošega za naše ljude. Ali, aj je baš tak? I h vuodi su se hnuogi htuopili i na hrušku se hnuogi obesili. Oko nas je se punu tega kaj nam more biti h istu vrieme i na korist i na škodu. Bog nam je dal slobodu, a ljudi muoraju zbrati kakvi buju. Da bi si leš prispodobil nekakaf konačni smisal, radu se zmislim, da mi je, kak dečecu, bilu tešku h tersju delati. Oštriti, kopati, špricati, vezati, tertjačiti, podžijati… Zrasteš glih tuliku ka već niesi malu diete, ali niesi još pre pravi snagi. I onda te hpregneju. Najpriet po malu, pa se bolj. Najrajši bi bil nekam hvušal, a nemaš kud. Ipak, lieta putujeju, a se tuo, saf trud, nij bilu za badaf. Prava je tuo bila škuola, zde znam. I za me i za tulike druge ljude. Liepu mi je zde h tersju delati i nij mi tešku. Od sih poslaf kere dielam, nie h tersju su mi najlepši. A najlepši posal h tersju, kaj mislite keri mi je? Zna se, braje!

H tersju je nes leš delati nek priet, negda. Tešku je najti ke kakvu flikicu tersja keru je još na kuolju, si maju stupe i žice. Ne treba kopati, s frezami se posal napravi punu priet. Jeni kopaju samu oko tersaf, a po redi samu kosiju s kosilicami ili flaksericami. Ne nosiju se šprice na plečaf. Ne treba ni vezati – ruožje se dievlje pod žicu. Dielaju se široke redi, nutre se more iti i s traktoram. Tu letu sam štucal škaricami za živicu…

Ali, treba i več krat špricati! Bolesti je več, a loza je bolj osetljiva na je. Negdu dievlje mrežu ober tersja, protif tuče, negdu h mrežu oblači tersje, či su ftičeki lačni i ljušta jim se baš gruojzdje. Trebali ste vidati tu pertilet h večerkima, kak je bilu smiešnu vidati ljude z baterijami, kak hodiju po tersju. Još jen nuovi posal se je našal – pobirati gusenice…

Preveč je velika i preliepa je priča o Zagorcima i jihavim tersjima, ka nijbi miela nekaj kaj juj daje značaj. Berba grojzdja h Pregradi, dnevi posvečeni trudu ljudih keri su sterpljivu, čes cielu letu delali i veselju, keru nam teče h vinskih kapljaf, dok se kaj treba dojde na svoje, naj dugu liet živi za se ljude dobre, dobre vuolje!

H Pregradi, 23. kolovoza 2014.

Fala Nikoli i Joži, za pomuoč pre pisaju.

 

Vezano

Arhiva

Arhiva kolumni

Reklama